Sinopsis

O PRESÉN ESTUDIO ye una alportazión t'o conoximiento d'o belsetán, dialeuto de l'aragonés conserbato en a Balle Bielsa, en metá d'o Perineu aragonés. Con a replega de datos de caráuter oral, s'ha puesto engalzar a faina d'a clasificazión d'os dibersos elementos morfosintauticos d'a luenga propia d'a Balle Bielsa. Talmén en uns pocos años no s'abría puesto fer ista interpresa, pos disgraziadamén l'uso d'ista luenga se i troba cada begada más enrinconau a las presonas grans, y, encara asinas, no en toz os casos. O suyo obxeto ye dar a conoxer a o publico interesau en cheneral, y a es propios belsetans en particular, a riqueza d'ista modalidá lingüistica aragonesa, que se troba en periglo de perder-se finitibamén. Atra pretensión d'iste estudio ye a de contreuyir a un millor conoximiento d'a reyalidá lingüistica de l'Alto Aragón -an sobrebibe no guaire bien a luenga aragonesa esmicaza en bels dialeutos locals u comarcals- ta una millor ambista de conchunto d'os rasgos compartius con atros dialeutos d'a mesma luenga, sin escudiar as suyas carauteristicas propias, ta onra d'os estudiosos trestucaus por o futuro d'iste biello romanze.