I yes en: Empezipiallo > Autors > Baitico. Chesús Garcés Baquer

Baitico. Chesús Garcés Baquer

 Yo me digo Chesús Garcés. Soi naixito en casa Baitico. Fuemos güeito chirmans; un murió cuan teneba dos años. Un altro cuan en teneba dezigüeito. Quedemos seis, e d’es seis ya no vivimos so que tres. Es chirmans se deziban: un Pepe, ixe yera el primer; dimpués yera María; dimpués yera Miguel; dimpués yera Pascual; dimpués yera Pedrito, que murió cuan teneba dos añadas; Rosa encá vive, que tiene agora noventaiseis; e yo, Chesús. Emilia ye la zaguera, que tiene güitentaigüeito años, dos menos que yo.

El pai mio yera naixito de Chisagüés, en casa Ferrer, e la güela mia yera naixita en casa Bandoma d’Espierba, e clar, la mai mia yera, pos de casa Baitico. Astí, con mi pai, tenioren estes güeito fillos.
El tio Baitico s’ha caracterizato siempre per el suyo amor al belsetán e a la luenga aragonesa, en cheneral. Ixo ye espezialmén meritorio en una persona mayor que vivió uns tiempos difízils, en es que charrar aragonés yera sinonimo de vergüeña e discriminazión. Una vergüeña e discriminazión que a sobén arribaba ta la violenzia fisica, sobre tot en l’ambito escolar.
Per l’argüello tan gran que teneba, e tien, de la suya luenga le valió el premio “Libertaz Aragonesas” atorgato el 20 de diziembre de 2005 per Chobenalla Aragonesista, rezibindo el galardón de mans d’Emilio Gastón, primer chustizia d’Aragón de la democrazia.
Baitico siempre ha colaborato con es filologos, lesicografos, antropologos e estudiosos que feban investigazions e troballos sobre l’idioma. Brian Mott, la filologa marroquina Amina Rhardisse, Antonio Martínez Ruiz, Ánchel Lois Saludas e Chabier Lozano, Juan José Pujadas… mesmo en altros suportes, como Aragón Televisión u l’Archivo Audiovisual de l’Aragonés. De siempre ha ofierto la suya colaborazión en tot e pa toz es que le’n han pedida.

Libros publicaus en Gara d'Edizions